UTWORY LAUREATÓW W KONKURSIE SZPASKI ŚLĄSKIEJ – “SZPASKA Z KWIOŁTKYM”
Przedstawiamy Państwu nagrodzone utwory laureatów w Konkursie Szpaski Śląskiej – „Szpaska z kwiołtkym”, zorganizowany przez Rudzkie Towarzystwo Przyjaciół Drzew, który został rozstrzygnięty w czerwcu 2013 r.
I MIEJSCE
BERNARD ŚMIGAŁA
ANKA BEZ WIANKA
Zrywała
kwiotuszki,
splotała
wionuszki.
Przipytoł sie Jónek
i ukrod i „wiónek”!
DZIYŃ KOBIYT W PRL-u
Tulpa ciynto,
abo nelka,
erbła w świynto
kożdo frelka.
A łod Zakładowyj Rady -
- nadziywane szekulady!
NIY TE KWIOTKI DLO DOROTKI
Jubileusz
łod Dorotki,
tóż Tadeusz
kupiół kwiotki.
Zamiast nelek, kupiół dómbki
i łod Dorki dostoł w zómbki!
—
II MIEJSCE
JADWIGA BOHLA
Nelki dla frelki
Na Fryncicie, roz do frelki
mody karlus szoł w zolyty,
w rynce piwko i trzi nelki-
karlus z niego niy łobyty.
Ech tyn soróń i ochlaptus, nic nie worte jego słowa;
Przebroł miarka, wnerwił frelka i nelkami dostoł w gowa.
Zegródka i Rudka
Zowiściły jedny Rudce
trzi zowistne fest somsiodki,
bo u Rudki na zegródce
roztomajte rosły kwiotki.
Beztóż wciepły czorno ciga, do szykowny jyj zegródki;
Ciga zjodła wszyske kwiotki, kere rosły u ty Rudki.
Siyrotki i inksze kwiotki
Na zegrodzie, kaj śniygotki,
tulpy, grzondki- kajś pod płotym,
wadziyły sie dwie siyrotki
i klachały za szałotym.
Kero bardzij urodziwo, kero bardzij kolorowo;
Naroz hazok zdeptoł łobie, kej szałotu podjod zdrowo.
—
III MIEJSCE
URSZULA OŚLISLOK
Tulpy
Tulpy kwitnōm
Chłop mi ryknie
Zaro kitnōm
Chociŏż pjykne
Kjejby dłuży wyczymały
Sztyngli sagich by ni mjały
Siyrotki
Jŏ siyrotki
Zasadziłach
Mōm ôd potki
Flance wziynach
Pjyknie już se rozkwitały
Dyć ślimokōm szmakowały
Gynsipympki
Gynsipympki
Rosnōm w trŏwje
Sagi pympki
Dziołchōm w głowje
Lepszy targać gynsipympki
Niż sie chwŏlić sagim pympkym
—
WYRÓŻNIENIA
—
BARBARA POLITAJ
Gynsipympki
Pympuszkym asi
Wyzgerno Hela
W zegrōdce Basi
Znolozła sztela
Pympek wystawio na gorke słōnko
We gynsipympkach gowisia tonko.
Nelki
Piykne czyrwōne
Kwiotki dlo frelki
W puket słożone
Z listkym– dlo Nelki
W ôczkach Kornelki krynci sie płaczka
Trza dować pozōr miyłość niy graczka
Moiki
Żōłte moiczki
Małe słōneczka
Zachciywne bliki
W wionku Aneczka
Karlus jak w ôbroz zerko na frela
Skuli moika chce sie wesela?
—
HELENA LEŚNIOWSKA
Kwiotkowy raj
Kōnwalio zwōni
Że mōmy już maj.
Tulpy koło ni,
Godajōm, że raj,
Bo raj jest wszyńdzie kaj kwitnōm kwiotki.
Na łōnce, polu, w zegrōdce ciotki.
Moikowy tepich
Małe moiki,
Srogo uciecha.
Seblyc szczawiki,
wroź je do miecha,
by wlyź na tepich świeży, zielony,
żōłtymi kneflami łobstrojōny.
Moikowy las
Były moiki,
prziszła maszyna,
to niy krōliki,
wszysko wycina.
Fajny był tepich żółto-zielōny.
Teroz jest trownik rōwno zgolony.
