Teksty laureatów Konkursu Poetyckiego “Szpaska w Lesie”

Dzięki uprzejmości i życzliwości Pana Adama K. Podgórskiego, przewodniczącego zarządu Rudzkiego Towarzystwa Przyjaciół Drzew Organizacji Pożytku Publicznego,mamy możliwość przedstawienia Państwu utworów laureatów Konkursu Poetyckiego “Szpaska w Lesie” 2011. 

SZPASKI w LESIE 

BERNARD ŚMIGAŁA (I Miejsce) 

Lyki z leśnyj aptyki

Na morzynie
- tyj z jarzómba.
Na krónżynie
- kora z dymba.
Zoft ze brzózki zrobi cuda,
jak ze blazóm mosz łostuda!  

Pozór na grziby!

Znod siniorki
pod brzózkami
i muszorka
pod jedlami
W dóma z tego zrobiół zupa
i “do gliny” wraziół… rzyć! 

Apfale – na chasiok!

Biksy, flachy
ze gorzoły,
stare łachy,
czy charboły
- wciepuj drap do kóntenera!
Na apfale w lesie – SZPERA! 

JADWIGA BOHLA (II Miejsce) 

 Sosna 

Mało sosna
W niebo zerko.
Rosna, rosna,
Byda wielko!
Niy być, sosno, tako rada,
Tukej bydzie autostrada. 

 Wiosynnie 

Świyrk do brzima
Szepto szumnie:
- Wiosna, zima
Jegły u mie,
Som na strómie cołki roczek
A tyś goły! Jak boroczek! 

 Domb Goduli 

 Domb Goduli
Na stracynie?
Wto przituli?
W nim spómniynie.
Stare dzieje, historyjo,
Toć pamiontka, toć mecyjo! 

 URSZULA PILNY (III Miejsce) 

Dōmb Goduli

Linda śpiywo
Ło Orszuli.
Rudzki dōmb gro
Ło Goduli.
Już świyrgolōm ich listeczki,
Zdo sie grajōm jak krzipeczki.

Jasiyń

Jasiyń stoji
I wachuje,
Czy wto broji
Wypatruje.
Gdy cichtujesz z bojtlym śmieci,
Kobyr spuści ci na plecy.

Idzie grudziyń,
Jedla ślimto.
Strach łod ludzi
Niōm pelynto.
Już siykyra siōngosz łapie,
- Kup sie sztuczno jedla, capie!

URSZULA OŚLISLOK (IV Miejsce) 

 Domb

Szumi w lesie
Domb zgrzibjały,
Echo niesie,
Że zmurszały.
Łod starości chrobaczywy,
Ale jeszcze żywotliwy.

Grzyby

Mechy leżom,
Kozok rośnie,
Ludzie idom,
Rwać radośnie.
Kjejby sie na grzybach znali,
Gaduwów by niy targali. 
Chojinka

Szpica mjała,
Korzyń w ziymi,
W niebo gnała,
Cojś sie mjyni.
Porki pod niom siadowały,
Kusiki tam smakowały. 

MAREK WACŁAW JUDYCKI (IV Miejsce) 

Tam kaj trowa,
Tam kaj krzoki,
Z prawa, z lewa,
Zowdy ptoki
Tu cukrówa, ojla, sroka…
Durś godajom, że mom ptoka.

Francek z Rudy,
Ernst z Fryncity,
szli do Trudy
na zolyty.
Jorg z Szwarcwaldu z Agnes polazł,
tam kaj richtig jest Czorny Las.

Ziga z Walom,
wczesnom wiosnom,
wandrowali tam, 

kaj rosnom
betki, psioki i brzószczoki,
zajonczoki i prawoki.

BARBARA POLITAJ (V Miejsce) 

Brzezinowy lasek

Pod brzózkami
Frelka kuko,
Z prawikami
Zgody szuko.
Sam oszydny, hań rychtyczny,
W swoji zorcie roztoliczny.

Muszorki

Kapelmycka,
Biołe krapki,
Zjysz troszycka,
Dochtor drapki!
Dyć to trutka dlo czowieka
Kaj paradzom – mijej eka.

We świyrczkach

Hań kaj świyrczki,
Grzibiorz kuko.
Niy trza świyczki,
Kej grzib szuko.
Liszki gryfne i siniołki,
Szumne z lasa to aniołki.

GRAŻYNA KISIELEWICZ (V Miejsce) 

* * * 
Niy je piyknie
W lesie śmiecić, 

Wiedzom wszyskie
Nasze dzieci. 

Styknie trzimać sie prawideł, 

Niy trza bydzie na cia “wideł”.

* * *
We tym borze, 

We tym gaju, 

Czuj sie dobrze, 

Niczym w raju.
Siednij niykej tyż pod sosnom,
Kaj na jesiyń grziby rosnom. 
* * *
Ze bukietym
W rynkach bazi
Lekkim krokiym
Karlus łazi
Natargoł ich w lesie mocka
Frelce co mo bystre łocka. 

KRZYSZTOF KOKOT (VI Miejsce) 

* * *
we lesie
drzew tyla
ale sie
niy myla
buczek sie nazywo,
tam moj ptoszek śpiywo
 

* * *
wszyske grziby
jak wieść niesie
rosnom niby
gynsto w lesie
ino niych mi powiy ftory
trefiom ciyngym muchomory
 

* * *
bioło brzoza
pod niom pora
modo koza
bryzie kora
a łoni sie przitulajom
blank na koza niy zważajom